Introduction

بسم الله الرحمن الرحيم

والصلاة والسلام على محمد صل الله عليه وسلم

ان شاء الله هنبدأ مع بعض android course من الاول خالص يعنى مش لازم يكون عندك خلفيه عن java ولا android وبإذن الله ناخد الموضوع خطوة خطوة لحد ما نتعلم نعمل applications بس فى الاول قبل ما نبدا احب اتكلم فى كذة نقطه وبعد كده نتكلم فى النظام اللى هنمشى بيه فى الكورس .

اولا : احنا كمبتدئين لازم نعرف ان السكه قدامنا طويله فمنزهقش بسرعه طالما قررنا نتعلم حاجه نكملها لاخرها ولازم نتأكد ان اي professional developer فى اى لغة برمجه مر بمرحلة البداية ديه وماحدش اتولد professional  فى اى حاجه اهم حاجه نصبر على نفسنا ونشتغل عليها كويس اوى وما نستعجلش النتايج وخليك متأكد انك بإذن الله هتوصل فى الاخر للى انت عاوزه .

ثانيا : ما ينفعش حد يعتمد على كورس بس سواء كان الكورس ده بيروح ياخده فى مكان او من على النت او حتى بيدرسه فى الكليه لان ما حدش بيقول فى الكورس كل حاجه ، الكورسات  ديه كلها ما هى إلا انها بتفتح الطريق قدامنا بتنورلنا الطريق يعنى والباقى بقي مجهودنا اننا ندور على المعلومة ونتعلم من مصادر كتير بس طبعا ده لما نتعلم الاساسيات الاول يعنى ما ينفعش اكون مبتدئ لسه واشتت نفسى فى كذه حاجه اتعلم منها

 اخلص اللى فى ايدى وبعد كده ادور على حاجه تزود معلوماتى اكتر وتطورنى اكتر الا لو حد عنده خلفيه عن الموضوع فيقدر يشوف كذه مصدر ويستفاد منهم ده طبعا راجع على حسب معلوماتك فى المجال ، بس فى وجهه نظرى المبتدئ يُفضل انه يركز عشان ما يعقدش الدنيا قدامه .

نتكلم عن النظام اللى هنمشى بيه فى الكورس :

 - مبدئياً احنا زى ما قولنا هنشرح من اول java بس مش java كلها اكيد الحاجات اللى تخص android بس

- كل اسبوع هنزل درس وزى ما تحبو تذاكرو الدرس على مره واحده او تقسموه خلال الاسبوع ، وعلى حسب الدرس هنزل معاه task  

- وبدايه كل درس جديد هينزل ملفين الاول فيه حل التاسك بتاع الدرس اللى قبله لو فيه والثانى لو اى حد عنده اسئله فى الدرس هيكتبها فى كومنت وان شاء الله هنجمع كل الكومنتات ديه ونجاوب عليها وننزلها فى الملف التانى

اهم حاجه نستعين بالله ونصبر على نفسنا وربنا يوفقنا فى الكورس ده ونستفاد منه كلنا 

وان شاء الله الكورس هيبدا  الجمعه  23/5/2014 هنزل اول درس .